Explore Kitchen (Closed)

就嚟新年想食西餐, 因為跟住落嚟一連串團年飯聚都會係西餐多， 咁啱見到呢間冇負評嘅餐廳，價位ok,又似幾好食就walkin 入去。一出𨋢就見一棵大聖誕樹，餐廳樓底好高，但空間及座位有限。 坐低先知冇 Dinner set menu,不過都照食， 叫咗個龍蝦湯，主食叫了 西班牙辣肉腸蘆筍扁意粉及一個五成熟嘅炭燒牛肩胛翼板肉。 所以雖然啱啱去完熊本，鹿兒島，有兩晚都食炭燒和牛，但作為一位牛魔王， 好味牛肉係點都食唔厭。侍應姐姐話喺openrice收藏就有得送餐湯或者水牛城雞翼，因為我哋本身已叫了龍蝦湯所以就揀咗雞翼。龍蝦湯都幾大玩夠兩個人share,麵包好鬆脆, 甜醋同橄欖油食好得。水牛城雞翼係單骨， 方便入口 ，酸酸辣辣, 好惹味， 底下的火箭菜都好新鮮。西班牙辣肉腸蘆筍扁意粉， 西餐嚟講都幾辣。辣肉腸的油香被意粉吸晒， 加上茄膏辣粉嘅味道， 炒至乾身， 好惹味。炭燒牛肩胛翼板肉， 表層燒到好靚，內裏保留到五成熟，切落仲見血。 肉質鮮嫩， 分量夠，足10安， 配菜的蒜粒同車厘茄都整得好味本身想食埋個甜品，肉桂條配雪糕，但實在太飽，所以就冇食到，呢個可以留返下次黎再食。