肥姐蠔餅婆

Open Now

Now Closed

元朗除左有好多好食既茶記之外，唔少得小食，而芸芸元朗街頭小食入面，最深得我心既一定要數「肥姐蠔餅婆」。係幾年前肥姐女兒患重病，有網友熟客得知事件之後係facebook發布消息，呼籲元朗人或者黎元朗既人幫襯支持小店，當然依家已經雨過天青，肥姐既敬業樂業確值得我地尊重。小店多年來都係老模樣，食既係肥姐既手勢唔係環境。呢到有張枱仔，比你加醬汁、自己倒垃圾同疊返好隻碟。價錢主打賣蠔餅，分1-4件，價錢都係$30/件，另外都有鳳爪同飲品。肥姐蠔餅　$30/件即叫即煎，炸粉夠薄，最緊要係蠔要夠肥美，蠔新唔新鮮都睇處理手法，呢到既蠔有肉汁有鮮味，而且蠔份量都夠，配上脆脆既炸皮，好香口，枱面有秘製泰式酸辣汁，我自己就一定會點，因為絕對係畫龍點睛，令成個口感層次更加提升同埋更加惹味。基本上一、兩個星期就會食一次肥姐，一係食完晚飯黎食個宵夜，一係就口痕過黎食件過下口癮，我唔會話佢係最好食既，但肥姐既心機同埋蠔餅中上既質素已經足夠令我經常幫襯。