永順食店 (Closed)

一個九龍人到底有幾痴線先會入元朗食沙牛麵？！（所以先會順路去埋大棠睇紅葉...）早幾日同中同食完榮記個沙牛煲仔麵，講起香港沙爹牛肉麵關注組吹捧得最勁就係慈雲山榮記，元朗永順同荔枝角好好運。之前有人報10點半賣晒沙爹牛肉，於是我地星期日就晨早揸車入元朗，九點半去到永順，排5分鐘就有位。沙爹牛肉麵要出前一丁底 $29，個沙爹牛肉好多醬汁，不過唔會太杰，亦唔會比個湯底溝淡晒，掛麵剛剛好。沙爹汁味道偏濃，朋友仲覺得太鹹，我覺得可以接受，但又無外界讚到咁無敵。芝士流心蛋豬扒治 $27 呢個仲有驚喜，炸豬扒唔會好乾或者好油，雖然芝士無溶，流心蛋黃又流走左一半，但成個三文治配搭好夾，好味。永順食店沒有套餐，食物飲品只有單點，落單時無為意，叫完凍檸茶睇單先見知$45，單點凍飲$16唔算貴，但我知道既話未必會叫野飲。平心而論，永順係幾好食，但要晨早山長水遠去排隊食碗沙牛麵，試一次就夠。