鴻師傅 (Closed)

觀塘的「鴻師傅」或許無人知，但其實這卻是名店「阿鴻小吃」的快餐副線，但兩者的菜單其實分別頗大。第一次來是它剛開張時。那天該店差不多關門前往之，叫了個蝦乾肉餅套餐，唔錯，肉餅幾有質感，但考慮埋價錢不算值專門去吃，反而個蕃茄薯仔湯好濃，可能我是當日最後一個客，當日睇場的老闆鴻師傅請我飲多碗。此外，我仲叫個素鵝，味道倒跟阿鴻小吃的差不多。真正吸引我再來的是一味咖喱牛腩腸粉。廣州可以食到柱侯牛腩腸粉，反而香港很少人做。所以發現鴻師傅有相似的東西時我便特別上心。這裏的牛腩其實可以再軟身一點，但亦不算難咬，反而最欣賞它用布拉腸，此物可更索咖哩汁。而咖喱膽挺不錯，唯偏向港式做法，香味不夠澳門咖哩。由於此店偏貴，性價比唔高，唔會話特別推介，但純粹為了呢個六十幾蚊的咖哩牛腩腸，倒可令我間中食番幾次。