彩

Open Now

Now Closed

沾麵最近興起，唔想去銅鑼灣排隊，就嚟元朗哩間隱世沾麵店。夜晚差唔多9點嚟到都係要排隊，前面仲有5,6個人，望住入面就更加想食。 門面好有日本feel,有少少神秘嘅感覺。好喜歡道木門，兩邊都可燙開，方便進入。大約有十個位，全部都係吧枱，可以圍住師傅望住佢地準備食物。 好喜歡可以望住師傅整食物，可以睇到師傅嘅認真。見到師傅全神貫注咁準備食物，準備湯時好似對待藝術品咁，睇到我好想品嘗一下。因為已經好夜，只有麥麵。 麥麵彈牙有咬口，而且做得好乾身，麵唔會一pat pat。一份麵都幾大份，食完會好滿足。有四款湯揀，今日試左蝦湯同黑油湯。 蝦湯真係好濃郁，雖然無蝦肉，但依然好鮮味。因為有豚骨湯底，所以感覺好日式。 黑油湯味道較濃同鹹，不過因為係沾麵，唔係湯麵，都可接受。湯底有好多炒香左嘅蒜，夾埋豚骨湯好惹味。另外食材好新鮮，筍好鮮甜，豚肉啱啱半肥瘦，但肥肉部份不肥膩，同瘦肉一齊咬，互相中和。沾麵嘅湯都比較偏濃，所以食到中途都有加入店舖自家製嘅檸檬醋，味道酸微微，好清新。天氣開始回暖，唔想食湯麵咁熱，沾麵係不錯嘅選擇。味道，質素同外貌都令人滿意，此店必定再訪。