醉潮館

Open Now

Now Closed

好耐冇食過海鮮砂鍋粥，見醉潮館都幾多人推介砂鍋粥所以就去訂位試吓。兩款推介小食率先登場！牙籤雞外型好的骰，雞粒炸漿外層加左燕麥，食起嚟更脆更有口感，一支牙籤一粒，再加支啤酒啤一啤超爽皮～小米餃好cute，皮係用薯粉整嘅所以好煙韌，肉餡嘅味道好似魚皮餃，口感唔錯但偏鹹，唔算大驚豔但幾過癮一試無妨。萬眾期待嘅砂鍋粥終於嚟啦！Order左大膏蟹加兩隻蟶子王同花甲王一份。粥底吸收左海鮮嘅精華勁鮮甜而且褒得好綿，大膏蟹有唔少蟹膏同個粥混合，正！大膏蟹好多肉，尤其兩隻蟹鉗啖啖肉。花甲王係一個唔錯好嘅選擇，爽甜得嚟冇沙，四個人仲可以差唔多一人分到兩隻，性價比都算高。蟶子王我冇食到，不過屋企人話一般般。鐵板黑椒豬仔髀有驚喜！鐵板端上嘅時候吱吱聲，超震撼，勁有鑊氣！豬仔髀超爽嫩，加黑椒汁超惹味，$108有六大支豬仔髀，性價比極高！繼砂鍋粥最多like嘅菜色~椒鹽鮮魷味道都唔錯，不過不失。細佬話見review有人試過潮式胡椒豬肚雞想試試，menu又唔見，樓面話幫我問下廚房又有喎。胡椒味唔算好重但d雞好肥所以個湯底都幾油，雞件都算嫩滑，豬肚就一般媽咪話有d餲，$288嚟講有d失望，可能叫多幾款餸仲多驚喜。