LAB10 (Under Renovation)

平時好少可嚟到旺角朗豪坊樓上食野，咁啱經過見到間平平地嘅韓燒，而且裝修好似幾得意咁，有啲似自修室咁，每個位之間都隔住塊板，一於就入去試下啦😊！雖然呢度係食韓燒，但餐牌上寫住無煙韓燒，同埋個爐同平時食嗰啲韓燒有啲唔同，所以燒起上嚟都唔會話好大味，我都唔需要擔心件褸吸晒啲味啦😅！呢度有得比你揀任食或者散叫，如果任食就$248 一位，最後我同朋友都揀咗散嗌。叫咗個牛牛板🐮，好得意呀，同個名一樣，真係用一塊牛牛板去裝住唔同部位嘅牛，有韓式牛肋條、厚切牛舌、安格斯西冷、特級牛後腹、黑牛牛板腱、特級牛小排、嚴選一口牛，總共有7款，啱晒2個人食。啲牛好有韓牛嘅味道，尤其特級牛後腹，牛味濃郁，肉質嫩滑，太好味啦😋😋！濟州三色豬五花🐽，個人比較鍾意食韓國嘅五花肉，呢度嘅五花肉唔會太過肥，燒起上嚟好香，脂肪比例恰到好處。點埋特製生薑蘋果醬🍎、生薑菠蘿醬🍍同青檸醬，味道酸酸哋，另有一番風味。韓式牛肉炒粉絲炒得好香，啲粉絲條條分明，唔會嗱埋一堆，加埋韓式牛肉一齊食，非常好味！🤤飲品方面我哋揀咗個Captain Lab & Red Hot，佢用咗實驗室嘅容器去裝住啲飲品，完全match番晒餐廳個名Lab 10。