好到底麵家

Open Now

Now Closed

今日同媽咪去元朗整野，行行下，媽咪突然話想食 好到底既麵，我仲話好丫，買返屋企煮黎食。點知我媽話洗咩自己煮丫，堂食啦。原來一直以黎，都係我誤會左，我以為好到底只係賣麵餅，唔知原來係一間雲吞麵舖，真係無知。第一次入黎，真係好懷舊嘅感覺，所有既物件都好衝擊，好似回到細個既情景。尤其是今次仲係同媽咪一齊黎，心裏面有啲酸酸嘅感覺😶。突然發覺原來咁多年從未去接觸既東西，其實一直都喺身邊生存緊，但當你有時間去接觸時，所有野都已經變得殘舊，只有情懷不變。沉思左一輪，阿媽已經急不及待，叫左野食啦。叫左一碗雲吞撈粗 $39，一碗雲吞麵$30，同細淨水餃 $30， 麵質好彈牙，可能好耐無食蠔油撈麵， 味道啱啱好，好好食， 雲吞就細細粒，無咩特別， 相比之下我覺得水餃仲好味，水餃既餡有木耳，所以好爽口，呢個口味同一般既好唔同，吸收埋D湯汁，令人回味無窮。呢D咁有風味既舖頭，唔知又會有幾多人忽略佢嘅存在價值呢？