龍德樓 (Closed)

作為工作忙忙碌碌的夫婦，根本冇機會喺屋企煮飯，所以我哋都習慣咗每晚去屋企附近搵嘢食 。今晚亦唔例外，但係都好似想搵返一啲住家菜嘅感覺，我地今晚去咗龍德樓，話曬有湯有飯仲有碟油菜感覺健康啲！今晚我哋點左個溫馨二人套餐: 我哋兩公婆異口同聲揀選咗個杏汁白肺湯， 個湯都算係幾足料，不過白肺就細粒咗啲，菜就好多，湯亦都夠味，不過如果再多啲杏汗咁就更加完美嘞！點心方面，我哋揀咗個灌湯餃食，因為其餘點心感覺上都冇灌湯餃咁貴，好似揀灌湯餃抵食啲！ 灌湯餃 亦都冇令我哋失望， 皮薄餡靚 ，有好多肉同埋啲分量都啱啱好！食落都幾好味！主菜我哋揀咗個鹿兒島豬頸肉煲仔飯再加碟油菜， 豬頸肉唔錯，味亦都啱啱好，不過有啲啲肥。油菜就一般水準！最後個甜品揀咗蛋白杏仁茶，呢個就麻麻地啦！半邊凍半邊熱 ，覺得做呢有啲馬夫！另外龍德樓嘅碗碟亦都唔算好乾淨，基本上要重新再洗一次，所以衞生上要扣分。值得一提其中有一個侍應係後生仔，服務態度非常非常好，亦都好體貼對客人，好有禮貌，做野好勤快值得嘉許。最後埋單150蚊有找以兩公婆晚餐嚟計算係抵食!