Video
Read full review
2019-02-17
4036 views
近年多咗啲乜乜乜水產日本料理店，顧名思義，主打就喺食「海鮮」，日文漢字就喺「浜燒」。小弟以往都食過好幾次，不過，就真喺唔多，因為消費相對高吖嘛，但喺，食親浜燒都喺好嘅體驗嚟。今次趁農曆年，約咗其中一位表姨甥女嚟食晏，食啲好嘢賀佢完成本書，卒之出關。入到去，一派居酒屋嘅格局，又有好多日式擺設，再者，配合柔和嘅燈光，就算晏晝嚟都蠻有氣氛。當然，唔少得啲日本海產店嘅旗布，天花陳設咗個大魚網，甚具漁岸風情，加上枱上已放設浜燒專用嘅烤爐，旁邊喺醬油、用具……等等，喺要明確等客人都知佢哋喺有做浜燒嘛。安座之後，就睇睇有啲咩食，略略掃描一次個餐牌，就會見到選擇甚多，包括：期間限定、刺身、三文魚特色菜、壽司、卷物、貝燒、浜燒、野菜、沙律、酒肴、揚物、天婦羅、逸品、鍋物、食事、甘味，可謂應有盡有。飲品類同樣選擇多多，如燒酌梳打、燒酌拼茶、特飲……等等，當然，汽水、啤酒、清酒就必備架啦。最好喺無論食物定飲品，均圖文並茂，心裡有個底吖嘛。此外，仲有塊黑板仔，寫咗好多日本直送嘅「新鮮」貨，以及一啲推廣產品。菠蘿梳打燒酎 $58小弟一向都唔多好酒，但表姨甥女就貪得意，點咗杯菠蘿梳打燒酎，小試一口，酒精度唔高，卻
入到去，一派居酒屋嘅格局，又有好多日式擺設，再者，配合柔和嘅燈光，就算晏晝嚟都蠻有氣氛。
當然，唔少得啲日本海產店嘅旗布，天花陳設咗個大魚網，甚具漁岸風情，加上枱上已放設浜燒專用嘅烤爐，旁邊喺醬油、用具……等等，喺要明確等客人都知佢哋喺有做浜燒嘛。
安座之後，就睇睇有啲咩食，略略掃描一次個餐牌，就會見到選擇甚多，包括：期間限定、刺身、三文魚特色菜、壽司、卷物、貝燒、浜燒、野菜、沙律、酒肴、揚物、天婦羅、逸品、鍋物、食事、甘味，可謂應有盡有。
飲品類同樣選擇多多，如燒酌梳打、燒酌拼茶、特飲……等等，當然，汽水、啤酒、清酒就必備架啦。最好喺無論食物定飲品，均圖文並茂，心裡有個底吖嘛。
此外，仲有塊黑板仔，寫咗好多日本直送嘅「新鮮」貨，以及一啲推廣產品。
菠蘿梳打燒酎 $58小弟一向都唔多好酒，但表姨甥女就貪得意，點咗杯菠蘿梳打燒酎，小試一口，酒精度唔高，卻有菠蘿嘅清甜味，非常之易入口。
白桃梳打 $52小弟就喜歡白桃多啲，簡單來一杯白桃梳打，冰冰涼涼，又夠晒大杯，好似飲極都有咁，好啱一陣食浜燒時作配合。
蟹子蟹肉薯仔沙律 $78啲薯仔沙律搓到成個波咁，撒上大量蟹籽，配合埋啲車厘茄，賣相清爽。老實講，蟹肉已混入晌啲薯仔沙律裡面，但食落感覺唔喺好多，但蟹籽就令到個薯仔沙律軟軟腍腍中多添卜卜脆爽口感。
刺身3盛 $160 + 赤貝 $68 / 隻店員話佢哋返咗唔少新鮮飛機貨，加上3盛啲刺身都會揀啲時令嘢，值得一試嘅。以小木盆再加上精緻嘅擺盤，單喺賣相睇見都已經賞心樂事啦！而3款刺身有三文魚、鯛魚及帆立貝，再額外加上赤貝，睇色澤都覺得好對辦，就連啲日本芥末都喺由鮮山葵即磨貨色。
刺身3盛 + 赤貝
33 views
0 likes
0 comments
雖然三文魚較普及大路，但市面未必間間店都喺好貨色。眼前嘅三文，色澤光亮，唔會暗暗啞啞，入口肥美油潤，食得出喺上好嘅貨色。
鯛魚雪白嘅魚肉，咬落帶點點爽口感，亮點喺魚味鮮甜，沾丁點醬油，更突出到其新鮮度。
帆立貝刺身級嘅帆立貝，予人感覺好唔同，既大粒有睇頭，又厚身，極富口感，最重要都喺軟綿鮮味。
赤貝貝類刺身一向都有市場，其實，靚嘅貝類亦唔便宜架。新鮮嘅赤貝，甚具咬口，咬落柔韌有嚼頭，而且，鮮味十足。
一輪沙律、刺身嚟熱身後，喺時候輪到浜燒嘞，新鮮嘅帆立貝及鮑魚，未燒都吸引呀，尤其後者，堅喺新鮮貨色，因為仲喺郁吓郁吓架。
浜燒
31 views
0 likes
0 comments
雖然無講明喺唔喺嚟自北海道，但食過就知喺靚貨。全程有店員幫忙處理，否則，衰喺小弟手就嘥咗啲靚食材啦。當帆立貝燒到咁上下，就加啲清酒同些少醬油，帶子食落鮮甜彈牙，帶微微酒香，而殼內嘅湯汁更千祈咪錯過，全部都喺精華。
鮑魚磯燒 $68 / 隻喺唔喺南非種呢？唔知，但同樣具質素，一樣下少許清酒嚟吊吊味，簡簡單單燒過，時間拿捏好，故咬落柔韌卻有彈性，鮑魚味比想像中突出，兼有少少炭火香嘅感覺。如果，順手剪為小件，更方便食客享用。
蟹味噌甲羅燒 $68、黑松露蟹肉甲羅燒 $68浜燒除咗有常見嘅海鮮之外，甲羅燒亦喺另一浜燒常客菜，只賣$68一客真喺好抵，因為，以往都食過，見一般都賣到成八、九十蚊。經處理過嘅蟹殼，連埋蟹膏、蟹肉、蟹籽、蔥花及鵪鶉蛋，放晌小竹籮度，睇見都好想快啲有得食。
蟹味噌甲羅燒、黑松露蟹肉甲羅燒
26 views
0 likes
0 comments
甲羅燒亦由店員幫忙烤熟，三扒兩撥就搞掂，熱辣辣嘅混合蟹膏，滔一羹入口，甘腴濃香，口感綿密細滑，食完，都仲覺得有一朕餘韻晌口腔盤旋。至於另一個，就加入黑松露，令幽香味更具層次。淨食其實單一咗少少，如能配少少薄片多士就更好。不過，我哋都醒，剩一半用嚟撈飯，堅喺得彈喇呀！
海鮮炒飯 $78最後加個食事打底，炒飯就方便大家「些牙」，個飯亦炒得幾唔錯喎，除飯粒分明，入口夠爽又唔油之外，仲有好多配料，如魷魚、蜆肉、蝦粒，更伴以蟹籽、蔥花添。
無論刺身，抑或浜燒嘅海鮮，都感受到食材新鮮，而服務方面，都讓我哋感到好稱心。最後，祝願表姨甥女本書大賣，話晒都辛苦咗幾個月嘛！
Post
