御黑堂 (Closed)

無喺紅磡出沒一段時間，估唔到好多舖頭都轉咗手，其中包括大大雞扒，變咗茶飲店。舖位幾大，舖名好型叫「御黑堂」😎，應該唔係連鎖，因為無喺第區見過。舖頭以熊貓🐼做招牌，幾矚目呢。飲品選擇幾多，有純茶、髒髒茶、奶茶、乳酪同黑糖系列等等，價錢由$1x到$3x不等，範圍都幾闊🥤。大部份飲品都有得揀糖量同冰量，我兩杯均要咗三分甜同少冰，而實際出到嚟都符合商品説明👍。六窨茉莉($16)，🍵茉莉茶味都幾濃，不過建議盡快飲用，否則耐咗會稍澀。另外，我加咗$5要蘆薈，份量幾多，並且唔會整甜咗杯茶。香芋珍珠奶茶($25)，朋友喜歡香芋嘅製品，所以我嗌咗杯畀佢。💜淺紫色美美的，由於減咗甜，香芋味未算非常突出，反而幾香奶味加幾滑。黑珍珠正正常常，幾好咬，有好多粒！小店主要賣飲品，但好似都有賣台灣香腸小食，我見到有個爐仔🔥。題外話，我依日買嘢飲，得一位女店員看舖，佢負責哂樓面同調飲品，勁啊👏！總括嚟講，如果厭倦咗連鎖店嘅口味，喺紅磡(都算係平民美食天堂吖😛)覓食後，不妨買杯試下，反正唔貴。