極尚大瀛喜日本料理

Open Now

Now Closed

好耐冇食放題，好掛住任食刺身。諗唔到除咗日本嘢飲食之外，而家連榴槤都係任食🌟🌟🌟啱晒鍾意食榴槤嘅朋友仔! 極品金枕頭榴槤用火槍輕輕燒過，食嘅時候暖暖地，好香榴槤味內裏軟滑😁基本上我都食咗成10件，平時榴槤咁貴，而家真係回本😎刺身方面款式好多油甘魚、三文魚、甜蝦、虎蝦、赤貝、帶子、吞拿魚、希靈魚，估唔到仲有鮑魚！今次一定好容易食回本，油甘魚一向我都鍾意，油脂充足魚味香。三文魚比想像中好，厚切肥美味道鮮美。鮑魚都幾大隻，幾甜而且有咬口。創作壽司、卷物都好正，特別係雙色刺身花朵(紋甲墨魚拼白蝦)，入面完全冇飯，魷魚新鮮得來好滑，白蝦鮮味十足。仲有鰻魚玉子燒😌鰻魚厚玉子甜。紅酒藍莓鵝肝都係好正，應該出咗冇幾耐，鵝肝幼滑味道濃郁，配上蘋果清清地，食好多都唔膩。西京燒比目魚燒至微焦，入邊魚肉油脂豐富超鍾意食。蒜蓉珍寶扇貝好惹味，入面好多蒜，扇貝都幾大粒有咬口。芥末沙拉蝦球隻蝦大大隻，裏面晶瑩剔透配埋啲醬汁☺️嘢飲方面講得出嘅都會有齊晒，值得一題，就係餐廳非常之趕得上潮流🤓有鴨屎香檸檬茶，佢哋嘅茶只係落咗好少糖，所以完全唔使擔心好肥，同時有鴨屎茶葉獨特香味，飲咗幾支先走。