陶園燒臘飯店 (Closed)

今日去開佐敦寶靈街排檔，竟然在後街見到個"爆肌型廚"！喺一間叫陶園燒臘飯店門外,有隻巨型燒鵝守門口，十分吸睛。原來呢度嘅荔枝柴秘製脆皮燒鵝最馳名，我就決定今晚斬料加餸，買咗燒鵝下庄($130)，同埋叉燒($50)，兩樣都係呢度嘅皇牌。事頭婆叫我下次可以試下鹵鵝，話一樣都咁有水準。返到屋企，打開盒鵝，已聞到陣陣鵝香，食嘅時候，覺得d鵝皮嘅荔枝柴香好突出，鵝肶裏面竟然有好多肉汁形成嘅啫喱，食落好juicy，鵝肉滑溜無渣，肉味香濃，鵝皮香口但唔燶，平時食燒鵝會覺得內膽好咸，但陶園嘅鵝一啲都唔咸，食到鵝的肉香，真係要個"讚"。我平時食嘢口味唔重，所以冇點附送嘅燒鵝汁。至於叉燒算好抵食又好食，$50大大盒。叉燒一啲都唔肥，但食落冇渣，仲食到麵豉醬嘅香味。今晚煮碟菜，斬料做餸，簡簡單單又一餐。下次會試下買鹵鵝。