九鼎記粉麵世家

Open Now

Now Closed

牛內臟衆多，分上雜、下雜，上雜例如牛柏葉、金錢肚清理較易，可以賣到高價。下雜處理複雜，但被牛什店好好處理之後就成為一道非常特別嘅美食。一碗牛什麵基本有有牛肚、牛腸、牛膀、牛肺、有時有牛心添。牛肚即係牛胃，有有4個胃，除咗上面提及嘅金錢肚(2號胃)、牛柏葉(3號胃)、之外，一般牛什店都係用草肚(1號胃)、牛沙瓜(4號胃)。牛沙瓜係4個胃最細嗰，產量少，某某中環大牌檔更加限量每日得1-2碗賣。所以見到旺角新開咗間牛什牛腩粉店有牛沙瓜食就過咗嚟試吓味道喇。呢間餐廳裝修雖然光鮮，但廚房對正街，一大盤牛什滾到出曬煙，上面又掛著牛腩、牛肚，都好有以前嘅風格。牛沙瓜質地似豬肉，但係有牛肚嘅味道，我配咗河粉，同牛沙瓜相反嘅口感特別過癮。另外仲試咗牛三寶，分別係牛腩、牛筋、金錢肚。金錢肚彈牙但係炆到好淋，牛筋軟滑，牛腩隔肥隔瘦，三者都炆到好入味。