新志興至尊燒鵝大王

Open Now

Now Closed

餐廳名都highlight咗燒鵝證明燒鵝係佢哋嘅招牌菜，味道亦都非常之出色，係必叫嘅一個餸。油炸鬼雞蛋焗魚腸係另一個非常受歡迎嘅餸，魚腸都洗得幾乾淨，焗得好香，有埋油炸鬼係會特別好食嘅。呢間嘅乳豬都非常之好味，皮燒得夠脆，肉算瘦，呢間嘅燒味好掂。西洋菜豬肺燉湯好好味，個湯好清，有冇味精，好足料，不過啲豬肺都幾大嚿。腐乳炒通菜正常發揮啦。香麻柚子骨其實即係類似韓式柚子醬做嘅咕嚕肉，不過呢度用嘅係豬扒，而且啲豬扒比較肥。沙薑豬手味道只屬一般，最主要係啲豬手唔夠入味，沙薑還沙薑豬手還豬手。個小炒王真係麻麻哋，冇乜鑊氣。呢間嘢嘅蠔餅都係唔掂嘅，雖然炸到好脆，不過我本身唔鍾意食炸嘅蠔餅，蠔餅都係煎嘅好食啲，最好仲要有薯粉，所以你明點解我話呢間嘅蠔餅唔掂啦。呢個避風塘茄子都係麻麻哋，痛樂脆漿炸咗佢再落返啲乾蒜頭就等於避風塘咩。總結係呢間嘢似乎燒味好掂，其他就一般，不過佢啲嘢真係好平。