牛魔 (Closed)

近排疫情似乎受控，所以我都多左出街搵食，今日就黎左尖沙咀食牛魔，呢度供應嘅午市套餐定價$85-125，雖然好似貴左少少，但以尖沙咀黎講，呢個環境再加上好嘅服務都算合理。午餐選擇就有慢煮牛肋骨、燒醬汁牛肉、鹽燒鯖魚、親子雞肉丼、石鍋飯等。慢煮牛肋骨套餐包括左有牛骨湯、白飯、三小碟、沙律同埋主菜，因為烹煮需時，所以落單後店員會先送上牛骨湯、三小碟以及沙律比我地食住先。牛骨湯味道濃郁，沙律菜新鮮，搭配胡麻醬一齊食非常開胃。三小碟有中華沙律、芽菜同埋小青瓜。燒醬汁牛肉套餐用鐵板上，上枱嘅時候仲聞到好香嘅醬汁味，牛肉煎得啱啱好，肉質非常嫩滑，牛味香濃，送飯一流！而洋蔥亦由於吸收左醬汁嘅味道，亦都非常惹味。同樣燒醬汁牛肉套餐亦都有牛骨湯、三小碟、沙律。