宮葉 パフェ (Closed)

假日係觀塘行街，到左晚飯時間肚餓，但唔想次次係大型商場食。行行下去到牛頭角道，無唸過會見到有間日本食肆，而且仲相當多人，所以就決定入左去試。一入到去，因為底層已經坐滿人，侍應就帶左我地上一層坐。 店內裝飾非常寬敞，光線充足。原來佢呢度除左有咸點之外，仲有好多甜點(例如waffle, 抹茶心太軟，拿破崙甜品等等)，同特色飲品。 我睇完個menu都心郁郁，最後決定叫吉列豬排親子丼餐 (仲附送麵豉湯)，加左8蚊叫左杯特飲藍莓乳酪果茶。個親子丼既豬排非常軟熟，香脆可口，唔肥膩。配料非常充足，洋蔥爽脆鮮甜，雞蛋嫩滑入口，冇得彈。 最重要係份量非常夠。而個麵豉湯用料充足，非常清甜。杯特飲非常好味而又唔甜，藍莓對眼睛好，而乳酪對腸胃好，茶底係抹茶，仲有好多生果做toppings，非常健康。最後我都係忍唔住再叫左個甜品香蕉太妃批。個批底非常香脆，仲間夾住香蕉，上層就係厚厚既toffee，而家唸番起都真係意猶未盡。 好彩今次肯走遠幾步醫肚，不過其實行番去地鐵站都只係需要5至10分鐘，大家都快d去試下啦。