Asian Lab

Open Now

Now Closed

今日去黃埔行街，發現一間特色餐廳，餐廳細細地，原來入面裝修非常精緻，好鍾意牆上嘅仿竹林牆壁，佢唔係用真嘅竹去製造，所以易於保養及打理，感覺好乾淨、好衛生。配合餐廳入面有好多綠色植物，感覺好清新，坐得好舒服。天氣咁熱，一定要飲杯冰凍特飲，我叫咗「豆腐花恐龍美祿」，大大杯，超冰凍，真係好解渴。食物方面好多元化，推介小菜「咖喱牛肋條配蒜蓉包」，咖喱入面有椰汁，味道香濃，牛腩煲到腍腍地，充滿牛嘅鮮味，而且易入口，配合脆卜卜嘅蒜蓉包，非常推介。食越南菜必食小菜一定係炒菜，餐牌上面有順化炒蔬菜，又有馬拉盞炒蔬菜，最後我揀咗「順化辣炒通菜」，非常惹味，少少辣，辣得來好香口。另外，揀咗一款小食「炭燒豬頸肉濱海」，軟滑嘅粉條製作成濱海，配上熱辣辣嘅炭燒豬頸肉，真係有炭燒嘅風味，好香。主食方面，揀咗一份「炸雞髀椰香飯」，雞髀炸到好香脆，而且大大碟好飽肚；仲有一碗「蕃茄蟹檬」，軟殼蟹渣到脆卜卜，配合蕃茄湯底好香濃，大大碗，好抵食。甜品方面，揀咗「流沙芝麻波波」，外脆內軟，會唔會太甜，甜度啱啱好。