古今

Open Now

Now Closed

放工想食日本嘢，就決定嚟旺角嘅古今。佢裝修好新淨，座位都好闊落，坐得好舒服。前菜要咗沙律柚想蝦你，沙律菜種類好多，好新鮮。另外有蝦同柚子肉，仲有牛油果同蘋果，口感幾豐富。另外嗌咗三文魚刺身同帆立貝刺身，佢嘅擺盤超靚。兩款刺身本身都好新鮮，帆立貝食落好鮮甜，三文魚厚切，好正。食古今一定要嗌佢嘅特色卷物，我哋嗌咗兩款嚟試。超級龍捲風入面有鰻魚、炸蝦，芝士同青瓜，加埋上面嘅脆片，食落暖暖哋脆脆哋，同佢個醬都好夾。粉紅佳人個卷入面係辣味三文魚、牛油果同蟹柳，上面再加咗一大堆辣味吞拿魚蓉、三文魚子同蟹籽，好好食。香蔥吞拿魚腩蓉壽司份量啱啱好，吞拿魚腩蓉食落好新鮮，驚特色卷物份量太多嘅，可以叫呢個試吓。熱食要咗雜錦天婦羅，有兩隻蝦、南瓜、冬菇同埋番薯仔，全部都炸到熱辣辣，炸粉唔會太厚，好正。最後我哋叫咗一串鹽燒白鰻嚟試吓，估唔到都幾驚喜，鰻魚一啲都唔腥，都唔多骨，個皮燒到好煙靭，我同朋友都覺得下次可以再encore。