平成 (Closed)

香港食肆大多數都係連鎖店，隱世小店美食已經係少之又少。今日行過尖沙咀，竟然俾我搵到間日式居酒屋，當然又要發揮我嘅本色尋下寶啦~舖頭面積唔大，但到處都有啲心思位，一入去就好似返咗轉家鄉日本咁🇯🇵。坐喺我偶像工藤靜香嘅海報隔離，聽住歌點菜更加別有一番風味。今次一共點咗五道菜同生啤 (去居酒屋前菜小食同啤酒先係重點):- 芥辣八爪魚豆腐: 八爪魚好彈牙，個汁微酸配滑潤既豆腐非常之夾。清爽之選，最啱就配串燒食。- 燒白鱔兩本: 上乘品質，肉質彈牙、厚肉，實在值回票價。加上喺香港食串燒唔係道道都有得食白鱔，黎到一定要試吓。- 鹽燒雞皮兩本: 又係特色美食，燒完即食十分香口，送酒確係一流。- 燒五花腩三重芝士蔥蛋餅: 呢間店嘅招牌菜，亦都係我覺得最好食嘅一道菜。出爐之後外脆內軟，芝士煙肉味香濃，口感煙韌，食落會拉絲，亦都好有飽肚感，讚。- 味噌醋魷魚甘辛鍋: 原條魷魚上鍋都幾壯觀，加上估唔到日式料理都可以咁辣，呢道菜幾有驚喜，值得一試。- 生啤 - 買一送一: 居酒屋當然要飲酒啦，買一送一就可以暢快咁飲番幾杯🥴全晚又食又飲，居酒屋果然都係同friend去最開心，尖沙咀又多個聚腳點可以啤一啤啦~🍻🍻