胡爐 (Closed)

雖然天氣越嚟越熱，不過作為火鍋愛好者都會繼續去搵不同嘅火鍋食下。呢間位置喺厚福街嘅樓上火鍋鋪，食法係做中上價位嘅單點火鍋店，不過見佢最近搞緊個半放題優惠就去試試。半放題套餐包一個煲底同埋一個拼盤，煲底有三款揀(雞煲/麻辣豬手煲/醉鴨煲)，見雞煲好似較常見，自己又唔太食得辣，就揀左較少食到嘅醉鴨煲。煲底都算幾足料，醉鴨都幾多肉而唔算柴，配埋醬汁都惹味，但就食唔到酒味，只得豉油醬汁味。跟餐嘅拼盤都好豐富，有澳洲和牛、牛舌心同黑豚肉，再加埋時令海鮮拼盤同丸餃拼盤，每樣都夠精。另外其他食材方面，雖然話呢度係半放題形式嘅任點，但係食物質素都算幾新鮮，肉同丸類都唔會出現溶雪唔夠嘅情況。職員態度好親切，做得好落力，不過美中不足嘅係可惜全餐廳嘅員工唔太夠，令到有部分點菜有漏單。同埋原來任飲汽水要另外加$38就相較其他火鍋店有點貴。