素食一家 (Closed)

屋企人生日嘅時候，去咗呢間新派嘅素食餐廳，本身已經book咗位，但去到依然好多人喺度等，等左15分鐘，終於入到去。我地3個人叫左魚生片、青檸猴頭菇、鰻魚炒飯、竹笙翅同生菜包，仲有個好特別的有機可樂。有機可樂係我好奇心之下叫嘅，好想知可樂點樣有機法，原來佢係用蔗汁加梳打做，好搞笑， 飲落其實同真嘅可樂冇咩大分別，只係多咗蔗汁味，有趣！魚生片夠凍，爽口，同真嘅魚生係有啲似嘅。青檸猴頭菇係我呢餐嘅至愛，猴頭菇切成薄片，炸到脆卜卜，但一啲都唔油膩，沾少少青檸汁，超fresh, 微酸醒胃，好味新食法！鰻魚炒飯飯粒好大， 素鰻魚好有咬口，味道剛好，讚！ 竹笙翅味道較淡，生菜包則有太多向日葵瓜子。總括來講，佢係新式嘅素菜餐廳，雖然我係食肉獸，但都要俾個讚佢！