丼造

Open Now

Now Closed

喺上環放工經過一間小店，見到佢哋嘅丼飯好似幾靚，決定獎勵下自己。雖然係外賣，但係擺盤靚靚好吸引，而且呢間舖主打即叫即制，食嘅時候魚生仲係好新鮮，串燒仲係熱辣辣。 ✦ 七色魚生丼顏色好鮮艷令胃口大好。材料有三文魚、吞拿魚、油甘魚、帆立貝、牡丹蝦、海膽、左口魚，仲有玉子蛋。 特別想提及海膽係完全唔腥唔臭，非常鮮甜味道濃郁，幾件海膽足以證明魚生有幾新鮮。 ✦ 特選壽司拼盤壽司拼盤亦有三文魚、吞拿魚，同埋帆立貝等等，同樣新鮮，而且份量唔細，唔係呃秤薄切type。 ✦ 串燒盛C 材料有雞翼、雞軟骨、免治雞、牛柳粒，同埋玉子，調味調得啱啱好。特別推介雞翼同埋雞軟骨，雞翼外脆內軟香噴噴，雞軟骨卜卜脆，好食。 呢間餐廳細細間完全唔起眼，但係食物無論味道同份量都相當好，啱曬喺附近返工嘅人獎勵自己。