金峰靚靚粥麵

Open Now

Now Closed

金峰可以話係我家附近唯一一間粥麵店，所以每到假期早上都大排長龍，而且輪候時間同喺酒樓等飲茶不遑多讓，所以而家我已經改變策略，只會在黄昏該店舖臨關門前半小時才去購買。一直都有網友批評此店的事頭婆態度欠佳，雖然我未受過佢氣，不過都在門口排隊時見佢規定啲客要點坐點坐，所以我都怕咗堂食，只會買外賣回家。但有時早上買外賣也不好受，排完一輪買嘢食，又再排一次等攞食物，獨市生意就係咁啦，鬼叫無競爭對手咩。今晚屋企煲咗豬骨粥，咁當然要買啲炒麵、油器嚟送粥喇。炸倆 ($10) --- 雖然夜晚食無朝早咁脆，但都算唔錯，可點甜醬或麻醬同食，始終粥店出品，點都做得出色過酒樓。銀芽炒麵 ($8) --- 炒麵加咗芽菜，非常爽口，比對面利苑嘅炒麵好吃，當然亦都油膩一點，始終利口唔利福。油條 ($6) --- 好脆，不過好油，用嚟點粥食好過就咁食。呢啲油膩嘢雖然可口，但只可間中吃，滿足吓口福之慾。另呢度每日會輪流有一款粥品做特價，$19 嘅粥會減到 $16, 一試無妨。