鮨真

Open Now

Now Closed

近排流行Omakase，即係廚師發板嘅意思，喺日文裏面嘅意思即係「交給你了」，當你講得出呢句說話要對個廚師有十足的把握同埋信任。今次嘗試尖沙咀亞士厘道「鰭真」，完全可以講得出"omakase"！餐廳環境擁抱維港，可以喺BAR枱一路同廚師傾偈，了解我哋今日食嘅嘢，一路欣賞香港嘅景色，真係一絕。而且餐廳嘅位置唔多，不論侍應或廚師都全情投入於同客人之間嘅互動，喺不知不覺間就食咗兩個幾鐘。食物梗係一流，食嘅嘢全部都係珍貴嘅食材，有黑鮑、野生拖羅、平政魚、魚翅、喜之次等，但係最珍貴嘅並唔係食材本身嘅價值，而係可以睇得出廚師對每一件食物都用心製作，就住食物本身嘅特質、口感、油份作深入嘅研究，然後選擇最好嘅料理方法，再加上不時不食嘅大前提下，所有食物都時令當造，充分展出不同食物嘅完美狀態，每一件食物擺落口都令人充滿難忘嘅回憶。