Casa Sophia Loren

Open Now

Now Closed

去咗灣仔呢間Fine Dining餐廳試吓，環境真係唔錯，有室內室外座位，幾有氣氛😍 食物方面，整體質素都幾高，擺盤又靚，絕對係慶祝或者約會嘅好去處！首先個前菜，我哋叫咗個鱈魚椰菜花沙律，好清新開胃，鱈魚好鮮嫩，椰菜花處理得好好，唔會太老；另一個什錦拿玻里酥炸米球配嫩牛肉，個米球炸得金黃香脆，內裡軟糯，牛肉又嫩滑，呢個組合幾夾😚之後到索倫托薯仔丸子配蕃茄汁及巴馬臣芝士。薯仔丸子煙韌有口感，番茄汁酸酸甜甜，巴馬臣芝士又加咗陣鹹香，正！另一個蒜香鯷魚意大利粉，鯷魚嘅鹹香好突出，蒜香又夠濃郁，好惹味。主菜我哋叫咗烤八爪魚同香煎白鰭魚。八爪魚烤得啱啱好，彈牙又唔韌，燈籠椒醬好香甜，配埋意大利貴瓜，口感豐富；香煎白鰭魚煎得外脆內嫩，蘆筍同番茄橄欖莎莎醬好清新。最後嘅意大利芝士蛋糕，口感幼滑，芝士味濃郁。