上岸料理 (Closed)

同事話帶我去食隱世料理，有好嘢食，我緊係即刻應約啦! 餐廳位於內街，比較寧靜，頓時明白隱世係咩意思啦! 餐具好精緻，細看碟上印咗猫猫圖案，好靚呀! 帆立貝他他伴冷茄子賣相精緻，茄子已去皮，加埋帆立貝刺身，口感差唔多嘅兩樣食物，食落出奇地夾。燒雞軟骨好爽脆，每次食串燒必叫。燒豚肉串有油香，豬肉好香口。燒雞翼外皮香脆，肉味好濃。吞拿魚腩多士鋪咗好多魚肉，因為加咗調味料嘅關係，食落好香好鮮，配埋多士食，剛好中和吞拿魚腩嘅油膩感。清酒煮文蛤味道鮮美，文蛤一啲都唔嚡，好清新。松葉蟹腳天婦羅啖啖細嫩蟹肉，天婦羅炸得鬆脆，一啲都唔油，除咗可以點天婦羅汁之外，亦可以點岩鹽調味，2款都能帶出食物鮮味。燒松茸好 juicy，松茸味道好濃好香，食落爽脆。加州卷中間又軟又香，飯粒分明有咬口，加埋脆卜卜嘅飛魚籽，好好味! 我哋要咗熱稻庭烏冬 share，烏冬食落又滑又彈牙。甜品我要咗柚子雪糕，食落酸酸甜甜，有陣陣柚子清香，好 refreshing!朋友要咗抹茶雪糕，抹茶味香濃，唔錯!同事果然好介紹，又試多間隱世餐廳!