Video
Read full review
2017-03-21
262 views
利申先，呢篇食評就無圖片，咁你可以話無相我講咩都得，信唔信由你。餐廳既食物賣相其實唔差，但係就.....話說上個禮拜一行四人，大概夜晚8點就係沙田新城市廣場搵野食。有位朋友就話之前試過呢間餐廳，覺得唔錯，所以就試一試。點知就......中伏。我地每人都叫左個set dinner，一個就叫左帶子意大利飯，一個叫左墨魚汁意大利飯，而另外兩位就叫鮮蝦帶子意粉（龍蝦汁）。前菜三個沙律一個湯。講番服務先，其實侍應既態度都唔錯，感覺上幾和藹可親。沙律一上到，我當堂嚇左跳。其實個沙律都豐富，有雜果，原片蕃茄，粟米同埋菜。之不過呢幾樣嘢個人認為就幾mutually exclusive，分開做幾款沙律仲實際，放埋一齊就有d喧賓奪主感覺，都唔知食邊個。咁你又可以話百幾蚊佢俾咁多料你仲投咩訴，我依家就係講緊我寧願要少d，都唔想放哂一齊。不過唔緊要，前菜始終係前菜，都只係整個套餐既1/4，適逢DSE，用番類比，啫係口試炒左，都仲有其他paper拉grade。而碗湯我問朋友就覺得無咩特別，都係平常一碗蘑菇忌廉湯。主菜上既時候，我都抱幾大期望，始終朋友話上次唔錯，而自己又對意大利飯情有獨鍾。點知朋友先食墨魚汁意大
話說上個禮拜一行四人，大概夜晚8點就係沙田新城市廣場搵野食。有位朋友就話之前試過呢間餐廳，覺得唔錯，所以就試一試。點知就......中伏。
我地每人都叫左個set dinner，一個就叫左帶子意大利飯，一個叫左墨魚汁意大利飯，而另外兩位就叫鮮蝦帶子意粉（龍蝦汁）。前菜三個沙律一個湯。講番服務先，其實侍應既態度都唔錯，感覺上幾和藹可親。
沙律一上到，我當堂嚇左跳。其實個沙律都豐富，有雜果，原片蕃茄，粟米同埋菜。之不過呢幾樣嘢個人認為就幾mutually exclusive，分開做幾款沙律仲實際，放埋一齊就有d喧賓奪主感覺，都唔知食邊個。咁你又可以話百幾蚊佢俾咁多料你仲投咩訴，我依家就係講緊我寧願要少d，都唔想放哂一齊。不過唔緊要，前菜始終係前菜，都只係整個套餐既1/4，適逢DSE，用番類比，啫係口試炒左，都仲有其他paper拉grade。而碗湯我問朋友就覺得無咩特別，都係平常一碗蘑菇忌廉湯。
主菜上既時候，我都抱幾大期望，始終朋友話上次唔錯，而自己又對意大利飯情有獨鍾。點知朋友先食墨魚汁意大利飯，第一個反應就係，吓，意大利飯係咁傢咩？我不如就咁食飯？意思係點解可以咁乾身。啫係部電話如果無得打電話send text，淨係可以打機，咁仲係埋一部電話呢？我不如去買遊戲機？不過我個份帶子意大利飯，撇除意大利飯唔係太得之外，d帶子煎得幾入味，賣相幾好。相反，意粉方面，聲稱係龍蝦汁既湯底好淡，完全無龍蝦味，所以味道上都比較單調。總體，雖然價錢唔係太貴，但係性價比都幾低。
到甜品同飲品，其實最唔滿意就係呢兩樣嘢。先講甜品，係雪糕同兩塊水蜜桃。未到之前，我地就聽到隔唻張檯既食客同侍應投訴d雪糕，雖然我地聽唔到投訴d咩，但係覺得雪糕點都唔會差得去邊。點知到既時候，我地一聞已經有d不敢恭維。唔知點解，d雪糕聞落去，有d臭味。而無論食水蜜桃同雪糕都有d奇怪味道，其實選擇最便宜既雀巢雪糕都唔應該係咁既味道，我朋友甚至覺得味道就好似細細個玩個d黏土，所以到最後我地四個都放棄，唔食個雪糕。飲品方面更加離譜，我地食主菜既時候已經叫左杯嘢飲，但係食完甜品，等到個雪糕融埋，杯嘢飲仲係未到。我地甚至吹左侍應兩次，但係都係好耐先到，其實成餐飯起菜好快，唯獨杯嘢飲遲遲都唔上。更大問題係有張檯，係我地食主菜既時候入，但係反而佢地嘢飲早過我地，仲要大家都係叫凍檸茶。當你認為呢餐飯既惡夢完結，其實未。呢間餐廳既檸茶，用既茶葉有d唔同，因為我飲落去，第一個感覺覺得似英式早茶，之不過好苦，真系好苦。我朋友就第一個反應係覺得d茶葉應該浸左好耐，好難入口，所以到最後大家又放棄左。
成個用餐經歷都幾差，今次係第一次寫食評，就係因為覺得間餐廳真係令人失望，所以想提醒大家三思。
Post