Garden Lounge

Open Now

Now Closed

哩個半自助餐雖然出面攞嘅嘢食選擇唔多，但質素好好，-海鮮有長腳蟹腳、澳洲石蠔、青口、蝦、蜆、小龍蝦、煮鮑魚。長腳蟹腳鮮甜唔太咸，石蠔鮮甜爽口，鮑魚煮得夠淋，個汁唔錯。-刺身有八爪魚同北寄貝。-冷盤以亞洲食物為主，包括泰式粉絲沙律、燒牛肉沙律、涼拌黑木耳、魚籽玉子蛋、鰻魚、煙鴨胸。煙鴨胸唔係來貨嗰D，係有好明顯嘅煙薰味，好香。-熱食有片皮鴨、燒肉眼扒、燒火雞、燒翠玉瓜、粟米芯。片皮鴨皮脆肉嫩，好食😋肉眼扒都唔錯。-主食方面，第一道菜湯類揀咗海鮮濃湯，個湯好飲。而第二道菜唔係自選，有海鮮濃湯貓耳朵意粉、烤大蝦配白酒汁、泰式炒雞肉碎羅勒葉生菜包同四川炒牛肉，4款裡面雞肉碎生菜包最好，其他就一般。第三道菜揀咗波士頓龍蝦半隻同薑蔥豆豉蒸石斑魚，龍蝦係折肉再用菠菜煮，再放入個殼，石斑魚都唔錯。-甜品方面有蛋糕同雪糕，因為12月，蛋糕有幾款係聖誕節主題，職員好有心機佈置，擺設得好靚，不過只試咗幾款，味道唔錯，雪糕最好食係雪葩，有紅桑子同檸檬味。飲品今次係西柚汁，埋單先知原來係任飲。餐廳環境舒適乾淨，服務好好，好開心嘅一餐。