大麥牛肉麵 (Closed)

今日黎到西環呢度，突然好掛住台灣嘅牛肉麵，就搵到呢間舖頭一試！環境清幽，係喺港島難得清醒嘅一個小角落，裝修以白色牆紙為主，行文青風，重點係舖面都好乾淨坐得舒服。晚餐menu將牛肉麵同牛肉喬麥麵放到最上，相信係對自己舖頭嘅牛肉麵好有信心先會將佢當主角放喺menu當眼位置，就一於試下佢！除左主食當然仲有數樣台灣小食，我同朋友一人一碗牛肉麵，一辣一唔辣，咁樣就清楚試到湯底味道同師傅嘅功架！原味湯底清甜，辣味湯底惹味，大家都不妨根據返自己口味揀🤣麵身有韌度，好好咬😂而且掛到湯，牛肉方面店主都大方用左4片黎配上，入味之餘又稔，有4片都唔夠食呀！小食方面揀左雞翼同紅燒蘿蔔，雞翼入味，食到廚師用過酒醃味，而且肉同骨好易分離，食得好方便！蘿蔔好入味，而且完全冇根，完全係台灣食到嘅質素！下次如果再喺港島想食台灣野，呢間都會列入我考慮範圍之中！