Cafe 360 (Closed)

屯門市中心嘅食大多數都係連鎖店，要搵啲小店而又有特色嘅cafe真係少之又少，所以cafe360喺屯門區已經算係一間比較大型同特別嘅cafe，成日都要排隊。今日見到下午茶唔使等就入咗去。嚟得cafe，都係諗住坐得舒舒服服嗻，呢度嘅裝修都唔錯，環境幾好。下午茶餐牌嘅菜式都多元化，焗飯意粉酥皮湯甚至甜品都有，價位就50-90都有嘅。肉醬意粉配酥皮湯再配紅豆冰係一個比較抵食嘅選擇。酥皮湯嘅酥皮整得好香脆，入邊係蘑菇湯，味道較淡。肉醬意粉表現正常，肉醬都夠撈成個意粉，味道一般啦，就同大家去快餐店食嘅差唔多。和風梳芙里多士配藍莓及香蕉。呢個多係整得幾好食嘅。外邊多士皮非常香脆，多士內有吉士，十分柔軟香滑，配埋啲生果係唔錯。飲品就熱咖啡同紅豆冰。大家見到紅豆冰個樣就知道，哎，我都唔多講喇。咖啡奶味好重，認真麻麻。結論就係甜品好食，熱食就麻麻，飲品就最好唔好有咩期望。