小南國 (Closed)

第2餐生日飯约咗朋友起小南國食。去到接待處，知客只比咗一張寫住7號枱嘅纸仔就叫我”過對面啦”，我初時以為有侍應會帶我，原來係要自已去揾張枱，真係估唔到起中環嘅高级食府都要自已揾位！當晚我同另外兩個朋友叫咗椒鹽黃花魚，醉雞，椒盬骨同埋一個什錦煲，甜品就要咗炸湯丸同桂花糕。椒鹽黃花魚係朋友極力推薦，黃花魚好香脆，唔多骨，我食魚最怕有骨，所以黃花魚啱哂我！醉雞我嫌佢唔够酒味，但啲雞都算滑。椒鹽骨就好一般，無味嘅！什錦煲嘅份量好大，材料有粉絲，津白，朱皮，魚蛋，蛋角，肉丸同埋薰魚。咁多材料，湯嘅味道就好甜(應該有落"師父")，但係因為份量實在太大，终於我地只係食咗一半咋，真係有啲浪費！甜品都唔錯，我最鍾意桂花糕嗰種煙韌感覺！呢間食店嘅食物唔算特別吸引，侍應嘅服務態度好一般，如果下一次到中環食飯，我諗我會揀番美心集團嘅洒樓囉！