牛市 (Changed Hand)

早前要去灣仔做嘢，搞掂差唔多到晚餐時間又餓又攰，於是就入咗「牛市」坐下，順便食啲嘢。小店細細，廚房同座位區面積各佔一半，但其實都算裝修得幾四正😄。小店用得「牛」命名，當然主打牛啦，牛，全部都係牛🐮！老闆大哥好友善，我問佢有乜推介，佢就話牛腩同咖哩一樣咁正，咁我就一於兩樣都試吓😝。馬泰椰香咖喱牛腩🍛，老闆專登整咗個迷你份量比我，因為得我一條友食嘛，正價份量多好多。咖哩香味撲鼻，但食落辣味都唔嘢少🌶。牛筋腩口感唔錯，另外亦有蘿蔔同薯仔。坑腩粉($78)，由於食完咖喱都過咗六點，冇得堂食，所以唯有外賣個粉返屋企食啦🥡。外賣碗有經過精心設計，因為可以將麵同湯分開，咁就唔驚河粉會浸到淋晒啦👍。坑腩紋理清晰，🐂牛味濃郁。湯底用牛骨熬製🦴，完全無味精，飲完唔會口渴。另外，客人可以揀芫荽蔥同炸蒜嘅量，加少少落湯底吊吊味，最適合不過。堂食嘅客人仲可以使用枱上嘅調味料🧂。總括嚟講，小店用心經營，客人係會感受到的。我認為整體唔錯，但略嫌價錢稍為貴啲啲，不過支持下素人嘅出品嘛😚。