阿里山 (逸酒店) (Closed)

  時不時行街都見到古早蛋糕店，撞到出爐，d香味真係香到流晒口水，今日去紅磡搵朋友，佢同我推介呢間 #阿里山 古早味蛋糕 ，佢話d蛋味特別濃，咁我即管試下，我同朋友夾份買咗粒粒朱古力、日本柚子蜂蜜、原味同四重芝士。等緊師傅切蛋糕個時順便傾下計，原來佢哋對原材料好講究，用嘅係日本麵粉；韓國砂糖，蛋就用湖北雞蛋，佢哋之前試過好多產地嘅雞蛋，最後覺得湖北蛋做出黎嘅蛋糕蛋味最香濃，而且佢哋每次都會先洗乾淨雞蛋至打蛋，比一般蛋糕店更衛生更用心。四重芝士蛋糕面有香濃芝士碎，咸香非常惹味，蛋糕內重有芝士夾心餡，配埋軟綿蛋糕，好正👍至於粒粒朱古力蛋糕，淨係見到面頭d朱古力粒，已經知夠晒足料，蛋糕入面重有朱古力醬，甜味適中，做下午茶點心真係好幸福，唔怪得當日買蛋糕個時見到好多家長學生都嚟買。由於蛋糕無防腐劑，所以室溫的話只可以擺一晚，之後就要放入雪櫃 咁就可以擺多兩日，如果驚食唔晒，可以個別要求師傅賣半份蛋糕都ok.