Vision 8

今日喺荃灣做完嘢，就搵個附近返工嘅朋友食個飯見吓面，地膽就帶我嚟呢間Vision 8。朋友話呢間西餐廳喺區內都幾受歡迎，好彩我哋入座時間尚早，7:30後已經座無虛席。點菜後，店員先奉上餐包，係三款唔同嘅麵包，有軟身有脆口，再配埋軟牛油一齊食，已經能夠喚醒我哋嘅味蕾。同女性朋友食飯，就特別鍾意叫個沙律，餐廳嘅黑板上寫上廚師推介嘅燒牛肉羅馬生菜炸洋蔥圈配蜂蜜芥茉蛋黃醬，我哋就一於試吓。平時食開嘅沙律通常都係配煙三文魚或者燒雞之類，呢個沙律係配燒牛肉加炸洋蔥圈，配搭清新唔油膩，燒牛肉配上佢嘅蜂蜜芥茉蛋黃醬就更加開胃。我想食生蠔，但朋友唔食生嘢，所以就叫咗酥炸生蠔，新鮮炸起外脆內軟而且好鮮味，配合他他醬一齊食真係非常夾。主菜我哋就揀咗小元貝西蘭花忌廉汁燴意大利飯配加拿大海膽。帶子同海膽都好鮮甜，意大利飯混入忌廉汁，再加上西蘭花等蔬菜，可以減去油膩感。另外仲叫咗蘋果木燒西班牙黑毛豬鞍扒，份量非常多。燒烤過嘅西班牙黑毛豬鞍扒有格仔紋理，充滿香烤嘅味道，而內裏仍然保持住肉汁。旁邊除咗有蔬菜，仲有忌廉薯片，比起薯蓉或薯條更加惹味吸引。