真珍記 (Closed)

今日打算喺深水埗食個光速餐，就隨意入咗呢間之前未試過嘅真珍記。呢度其中一個主打係車仔麵，亦有佢哋嘅自家製餃子。我哋首先點咗兩碗車仔麵。佢嘅粗麵比較厚身，有啲似台灣牛肉麵嘅面條。鮑汁花菇煮得入味。柱侯牛肚夠腍。而另一碗車仔麵就揀咗米線，米線屬於比較腍身嘅質地。鮑汁花膠有微微嘅鮑汁味，而且仲有膠質。秘製牛腩都係用柱侯醬煮食，夠晒入味。既然餃子都係佢哋嘅招牌菜，我就揀咗雙拼煎餃。小店比較不拘小節，因為係自家製，所以睇得出每隻都唔同。我就有強迫症，經本人幫佢整齊排列之後，就能夠分辨出鮮肉粟米餃同鮮肉韭菜餃，煎餃夠晒火候。餃子味道係唔錯，外賣生餃仲好經濟實惠，下次屋企打邊爐可以考慮幫襯下。