MASAM (Closed)

🍔專門賣漢堡嘅小店，漢堡種類幾全面，好多自家創口味，有牛肉、雞肉、豬肉嘅漢堡，另外仲有提供素食漢堡，一啲特別少少嘅例如軟殼蟹、炸魚、原隻蝦、鵝肝都有，可以話係咩都有，絕對滿足到唔同人嘅需求。大家仲可以按自己口味追加配料例如大啡菇、辣椒等。🍔德國辣炸雞堡 $58★★★★☆份量十足，橫切面都見到成個漢堡有幾厚身，一啖都食唔哂成個。辣炸雞好大塊，個包本身已經夠大，但塊炸雞仲要再大過個麵包。塊雞炸到幾酥脆，只係因為外賣，偏中間嘅點都有系系淋淋地。炸雞有層辣醬係面頭，唔辣酸酸地幾開胃，但略廉中間炸雞位置冇咩辣汁。除左炸雞，仲有一條一開二嘅德國腸仔，加埋啲漢堡配料(洋蔥、紫洋蔥、蕃茄、生菜)同埋沙律醬，成個漢堡口感好豐富，啖啖都好滿足。值得一提，本身一打開以為面頭係啲酸瓜，但原來唔係，係醃左嘅墨西哥辣椒，唔係好辣，但幾特別。成個包食落唔會太膩，大滿足！🌟總括：選擇款式多，小店2個人打理，食得出用心製作，不論份量、價錢、味道都中上，絕對值得一試👍🏻。