財記美食 (Closed)

近呢5至8年嘅觀塘實在變咗好多，由工業區開始轉型為CBD2（第二核心商業區）。觀塘雖然多咗好多文青cafe同主題餐廳，但呢區其實仲有好多抵食嘅茶記，絕對係享受男人浪漫嘅集中地！今日我哋就去到觀塘嘅財記美食，享受放工後A姐M佬茶餐廳小炒嘅浪漫。椒鹽鮮魷一坐低就送上例湯，飲住湯再揀小菜，呢度嘅小菜配埋白飯同飲品，夠晒抵食。香口嘅嘢食，幾時都係最吸引，呢碟椒鹽鮮魷嘅炸粉夠晒薄，一啲都唔油膩，做得一讚！外皮非常香脆，椒鹽嘅鹹香夠晒惹味，而鮮魷非常爽口彈牙，必食推介。魚香茄子煲食煲仔菜最治癒就係上枱嘅滋滋聲。份量非常多，鹹魚味濃香勁開胃，茄子走油，所以食起上嚟夠軟腍，味道方面少少辣，用嚟送飯就啱晒啦！豉汁蒸倉魚平時A姐屋企煮飯好少整魚，因為佢話好怕腥，所以出街食小菜，我都好鍾意叫條魚。倉魚洗得非常乾淨，肉質嫩滑，最正當然係同倉魚最friend嘅鼓汁啦，相當惹味。梅子蒸排骨梅子蒸排骨係A姐最鍾意嘅小菜（沒有之一），但自從我哋一齊之後，佢知我唔鍾意食酸嘢，所以從來都無叫，所以呢碟梅子蒸排骨絕對係佢久違嘅幸福。呢碟梅子蒸排骨份量超多，排骨夠入味，酸酸哋夠晒開胃，同樣啱晒送飯。