牛石料理 (Closed)

男朋友升職加薪話帶我去食好野喎，佢知我鍾意食日本野，於是帶咗我去九龍城食好野。九龍城多泰國餐廳呢樣眾所皆知，但除咗泰國野，仲有好多異國風味嘅野食。今日黎到牛石料理，入門口前已經見到一個個魚缸裝住好生猛嘅龍蝦同長腳蟹，瞬間對餐廳嘅食物質素非常有信心。店內以卡位為主，私隱度好夠，大啖大啖品嚐美食都唔怕失禮。首先出場嘅係海膽丼，海膽好肥美好creamy亦好新鮮 ，份量好多，疊起成個小金字塔咁，睇見就開心，用紫菜夾埋吞拿魚，一流！超好食。另一鋪頭非常推介嘅係藍龍蝦，藍龍蝦產量唔算多，成日缺貨，今日終於有機會一嚐佢嘅滋味，我地嘅係芝士燒半邊蝦加卷物，芝士味道濃郁，同龍蝦好夾，卷物內含龍蝦肉，比以往食嘅蟹柳，味道同口感都高下立分，非常推薦。店員都非常friendly，面帶笑容咁招呼客人，唔洗舉手都會自動幫你斟茶，好細心好有人情味，野食同服務都一流，希望有機會再黎過。