林昌記 (Closed)

呢間林昌記,位於連接尖東同紅磡嘅天橋中間, 位置就唔算方便啦, 之前想試好耐, 不過每次行到呢個位都已經係食到飽一飽,今次特登留肚 終於試到啦。喺天橋中間轉入去,呢度有兩間舖頭,左手邊嗰間就係林昌記啦, 舖頭細細只供外賣, 選擇唔多 一眼望曬, 主要就係魚蛋,魚蛋,同埋唔同味嘅魚蛋。不過正所謂貴精不貴多嘛, 選擇唔需要多,最緊要好食(牆上有poster貼住新品上市: 新出海鮮炸角 & 海鮮燒賣), 不過眼見個個都叫魚蛋,羊群心理作祟,我都係叫返魚蛋好啦。佢哋嘅魚蛋同我哋平時食開嘅有啲唔同,每一粒都白雪雪,滑捋捋,賣相相當唔錯,我呢啲怕辣之人鍾意原汁原味就當然係叫原味啦, 唔怕辣嘅你就一定要試下佢哋自家製嘅辣醬啦, 仲有現成一樽樽可以買走。魚蛋嘅口感同平時食嘅好大分別,咬落爽口彈牙,完全唔黐牙,唔會有種加咗麵粉嘅感覺,味道剛好,唔會過度調味。只係叫左細魚蛋(十蚊七粒) 都有個杯仔畀你裝住 , 唔使拎住串嘢喺條街度,拿手唔成勢, 最啱我哋呢啲顧及形象而同時又為食嘅靚女啦。