森記餐室飯館 (Closed)

上次同朋友嚟食，佢拍晒心口話嚟呢度食一定要食叉燒蛋飯，正式名為「皇袍叉燒飯」，話同親啲波友喺港島踢完都必定突登嚟食咁話。因為上次冇影相，今日突登落嚟補返，順便享受多次。要知道小弟對叉燒（無論港式定日式）我都有要求，除咗肥瘦適中、鬆軟綿密絕不能少，能夠有少少燶邊就更為一流。估唔到呢間除燶邊外接近通通做到。而且更係厚切添。雖知叉燒厚切係店主對自己出品嘅叉燒嘅信心表現。坊間快餐店、甚或部份燒味店嘅叉燒一般都係用刀一拍打散啲纖維再切，咁可以令客人感覺啲叉燒易咬冇根，又可以大份啲，其實只係想大家有個錯覺。呢間用厚切叉燒就見佢信心無比。另外值得一提嘅係個滑蛋，蛋香四溢，加上個汁同薑蓉嘅配搭，仲點輸？但又唔可以唔提嘅一點係厚切叉燒雖然無敵，可惜略嫌凍咗少少，希望店主能夠留意，令呢個「皇袍叉燒飯」 - 即滑蛋叉燒飯能更上一層樓。