祥興記上海生煎包 (Closed)

鋪頭位置不太顯眼，入面坐得十個人左右，不過佢做外賣生意嘅多，我哋都唔使等就有位。叫咗兩個蔥油拌麵套餐，內含有一杯豆漿一碗蔥油拌麵同兩個生煎包。兩個人驚唔夠食，另外加多兩隻鮮蝦生煎包同埋兩隻黑松露生煎包。鋪頭好細心咁用芝麻去區分生煎包嘅味道，多黑芝麻嘅係黑松露，正常分量黑芝麻嘅係原味，白芝麻嘅係鮮蝦。生煎包皮好薄而個底又煎得夠脆。三種生煎包入面黑松露最香不過冇咩汁，鮮蝦最多汁不過我覺得生煎包入面有蝦有些許唔夾，我都係覺得原味最好食。食嘅時候真係要小心我有兩次都畀啲汁彈到塊面蔥油拌麵蔥油同乾蔥夠香，加埋啲撈麵嘅汁汁都好好食。個人認為呢間舖嘅生煎包價錢偏貴，如果淨係想食生煎包食到飽嘅話會好破費，不過佢有好多唔同選擇而又幾抵食嘅套餐（麵+包），咁就可以食到生煎包過口癮之餘又夠飽肚。