夢 (Closed)

朋友極力推薦呢間餐廳，話啲嘢食好靚，打卡一流，又好食，慶祝生日就一於嚟試吓。前菜係京都豆乳，豆味香濃，仲用咗九州粟米造成湯汁，幾香甜。然後就嚟咗一幅畫，店員話係秋天特別版，好有秋意，靚到真係要慢慢欣賞下先捨得食。四款食物好精緻，分別係有烏賊、南瓜鮮百合、五色米通波波同埋一件白飯魚果凍。跟住呢道菜有啲fusion，用脆卜卜墨魚汁西米脆米紙裝住北海道牡丹蝦他他，配上法國魚子同埋牡丹蝦蝦膏，超級鮮味。跟住係刺身，有石雕、秋刀魚同埋春魚，我最鍾意秋刀魚，可能秋天當做，超級肥美甘香。呢個係分子料理，店員介紹啲泡用香格里拉松茸做嘅，下面用日本菠菜包住雜菇，係一度好精緻嘅蔬菜。跟住係日本脆鱗金雕魚，魚皮連魚鱗脆卜卜，魚肉啖啖肉唔腥。配菜有法國手指蘿蔔、蘆筍，有六款醬汁點㗎。仲有自家製嘅漬物柚子蘿蔔同埋蓮藕。跟住飲返碗麵豉湯再食埋甜品。甜品都唔馬虎㗎，有岡山縣晴王、芝麻柿同埋自家製黑糖mochi，食到舔舔脷。