倫住蒸倫哥私房菜 (Closed)

今日本來去太子NVP 動物診所探狗狗。探完後已經天色昏暗，加上有少少毛毛雨！就決定去附近搵食，轉入柏樹街，見到倫哥私房菜，外面主打＄238一位蒸氣海鮮套餐。價錢唔算貴而且仲幾化算！揀完每款海鮮想用咩方法整後，店員仲為我地送上燉湯、花膠鮑魚作前菜！燉湯好足料，而且無味精好健康，花膠鮑魚亦煮到好林好好食👍🏻蒸氣火鍋食海鮮最重要是新鮮！佢地嘅海鮮全部新鮮現劏唔係雪藏！龍蝦上菜時腳仲會郁添架！店員會逐樣海鮮咁上，然後會較好蒸嘅時間幫我地上菜。龍蝦、聖子、開邊海蝦、鮑魚、奄仔蟹、生蠔我地選擇左清蒸或薑蔥嘅煮法，因為咁樣更能突顯海鮮嘅鮮味！龍躉魚腩+蝦膠黑松露蒸豆腐我哋揀咗用麵豉醬蒸， 超香嘅豆豉醬配埋滑嫩 嘅魚腩肉，簡直令人回味無窮🤤最後仲會一個腸粉同荷葉蒸飯， 飯帶著淡淡嘅荷葉香，而且配料仲十足， 腩肉超好食 👍🏻而最後嘅提子乾涼粉更係完美嘅結尾，唔會太甜 食落去滑捋捋凍冰冰好透心涼~我地亦另外叫了一碟沙薑豬腳，滿滿嘅膠質仲好入味，超有水準！