樂廚私房菜 (Closed)

又係同一班好姊妹聚舊食慶生飯嘅時候， 其中一個姊妹誠意推介食樂廚， 話好難book, 所以早成個月已經book哂枱等食呢餐。經商廈門口上樓上，一入門口見餐廳裝修簡潔，真係有啲住家feel。入到房，有電視睇，好彩有部電視，唔係呢餐飯啲時間都幾難過，因為食咗4個鐘， 7點食到11點，唉。。。。。講返啲餸菜， 老實講，除咗個避風塘炒蟹叫好啲，夠味夠香之外，其他真係好家常。 個燉湯還可以，有味但生肉煲完嘅血塊渣太多，有礙官感！美極蝦冇色冇味， 唔合格！扇貝好一般， 好彩有返咁上下大隻！ 條魚好細條，而且仲有泥味同腥味，所以冇咩食過！隻沙薑雞冇沙薑味，似返蒸一樣，連誠意推介嘅姊妹都話唔ok! 金沙蠔應該係黃金蝦嘅變奏，但呢隻蠔一啲咸蛋黃味都冇，唔通就咁用蛋黃嚟做？個炒飯同糖水都俾好普通，不提也罷，但反而佢請我哋食嘅炸蕃薯丸有驚喜， 所以仲想去試嘅朋友可以試下叫呢個甜點！溫馨提示，嚟呢度食真係需要同啲好熟同好多話題嘅朋友嚟食，因為真係要食好耐！