一君士多 (Closed)

唔想透露年齡，但的確係睇港產電視劇大，雖然電視劇嘅製作、吸引程度大不如前，我都唔知幾耐冇開過部電視，但心目中總有幾套經典。如今好多藝人、名人、演員都投身飲食業，其中有呢間幾貼地嘅一君士多。主打本土野 - 車仔麵，以自己嘅名字為店名，瞬間勾起你嘅印象。選址尖沙咀，撇開光環，乾淨簡潔嘅門面都吸引到D生客車仔麵店鋪面闊落，以木色為主，枱面放有調味料同餐牌，餐具就藏於櫃筒裡。星期日嘅下午茶，入座時人流就唔多，但坐下坐下又幾多人，仲有外藉遊客添。主打車仔麵，除左最簡單嘅自選港式車仔麵，55蚊/3餸，包冷熱飲品；仲有D比較矜貴嘅食材，例如「富貴麵」有鮑魚、花膠同花菇；「蠔華麵」有日本廣島蠔同花菇，今時今日食車仔麵都可以豪D。原來除左麵，呢度仲有飯類，都幾多元化，吸納多D層面嘅客人。飯類有廣島蠔泡飯、牛腩咖喱飯、炸蝦咖喱飯、蔥油豬扒飯等等。午市同下午茶會比較優惠，會供應D港式粉麵、西多、三文治，下午茶兩點開始供應，都係30蚊起。同大部份車仔麵店一樣，都係畫紙仔落單，簡單易明。三餸車仔麵：揀左滷水雞翼、豬紅同辣魷魚，配幼麵，仲可以走埋青，幾貼心呢度嘅車仔麵餸嘅份量就唔係話好多，但下午茶來講，都飽到上心