海記合桃坊甜品

Open Now

Now Closed

夜晚喺太子轉車，想買下糖水返屋企做宵夜，路經呢間店，諗住呢個時間都好難搵到另一間糖水店，就試下呢間外賣。叫左香芋雪樂冰芋圓西米露，楊枝金露，芒果椰果小黑子。呢碗香芋雪樂冰芋圓西米露算最正常，不過啲芋圓除左有色外，根本一啲味都無，三隻色同小丸子一樣無味。呢碗楊枝金露，心諗點都唔會伏掛，個樣都正正常常，但唔知點解啲西米入面係混左啲爆珠入去，而且芒果食得出好似係啲大陸芒果咁，唔甜仲有陣好特別既味，個芒果汁底仲好似溶左既芒果雪糕咁，個味就係雪糕味，完全同我回憶中既楊枝金露有好大分別。呢碗芒果椰果小黑子，真心伏中之伏，想伏必點。我食過好多間甜品店都係正常芒果汁底配呢個小黑子，但呢間未食已經聞到有陣怪味，碗野望落去係紫色，食落不得了，難食到一個點，好似食緊化學野咁，連個芒果汁底都唔係芒果味，3個人分都食唔落幾多，就知唔想浪費都捱唔住。總結，呢間個名有合桃坊，咁可能真係合桃先好食，其他甜品真係試唔過，奉勸各位試其他比較好。想試下有幾伏就必定要點芒果椰果小黑子呀！