石亭居酒屋

Open Now

Now Closed

又到星期五放工食好西時間。今次就同朋友相約尖沙咀居酒屋食日本嘢。 居酒屋喺赫德道，灰色嘅外牆唔算起眼，入面嘅裝潢就似足日劇見到咁，有普通座有吧枱，我哋人少少就坐吧枱，更有風味。一嚟整個刺身拼盤先。 有鯛魚、油甘魚、拖羅、帶子、蝦、海膽同真蠔。 鯛魚魚味濃郁； 油甘魚同拖羅都勁厚切兼嫩滑，好juicy； 帶子口感綿密味道鮮美； 蝦就勁新鮮爽甜； 鮮色嘅海膽味甜零異味，高質！ 真蠔都算大隻，冰凍滑溜，食完滿口鮮味。 夏天食到咁清涼鮮味嘅刺身，超滿足呀。整盤大枝豆，一路剝住食一路吹水等熱食。 枝豆上面有少少鹽，食落都幾惹味。叫咗三款串燒：雞翼燒到金黃色，咬落脆皮，肉質鮮嫩； 牛舌就大塊兼厚切，好爽口； 骨付肉腸就肉味濃兼多汁。照燒雞扒飯 雞扒燒到好香，雞皮燒到微焦極脆，食落好香口。 下面嘅飯就有甜甜嘅照燒汁，明明好飽咗都忍唔住食晒～食完濃味嘢就整返啲清清哋嘅。 清酒煮蜆每隻蜆都大大粒又水潤，清湯嘅鮮甜再加香蔥嘅香味將蜆嘅鮮味進一步帶出，可惜少少嘅係酒味稍嫌唔夠濃。最後飲個靚湯作結。 鯛魚奶湯嘅魚味濃郁，仲有海帶、腐皮、白滑豆腐，營養豐富。呢度嘢食夠高質，地點方便，可以encore。