磊犇 (Closed)

行行吓旺角，突然心血來潮想食牛扒。於是去左依石板燒牛扒餐廳。餐廳裏面基本上係自助式嘅，一入到去就可以喺部機上面點單，咁我就叫左200g嘅西冷牛扒。然後又坐定定等部機響，等嘅同時就去咗夾沙律、麵豉湯同埋白飯。沙律菜都幾新鮮嘅同埋洗得幾乾淨，麵豉湯就略為鹹咗少少。講返個主菜牛扒，一上到黎我諗係得一成熟，咁你就可以隨你嘅喜好，等個石板慢慢煎到塊牛扒去到你想要嘅熟嘅程度。咁如果你鍾意食生啲嘅呢，你就要好快咁切左塊牛扒，然後將佢擺喺隻碟度，如果唔係佢就會變到太熟。我自己就鍾意食生少少嘅，所以我就好快咁切完就拎開咗塊牛扒。西冷牛扒肉質都幾好，牛味幾重，連埋啲沙律菜一齊食感覺冇咁油膩。成個餐$128，如果你唔想自己煎牛扒嘅話，黎呢度食都係一個唔錯嘅選擇。