Video
Read full review
2012-08-30
1190 views
人人一諗起天水圍，都會即刻聯想到「悲情城市」呢個label。其實今時今日香港通脹咁勁、深層次矛盾又多，區區老百姓生活唔多唔少都係悲情o架喇。不過如果以「民以食為天」呢個標準嚟計，天水圍的確超級悲情，事關就算肯花錢，都冇好嘢你食；求其數幾間(已經唔叫得做好嘅)連鎖食肆，burger king、扒皇、牛陣、翠華、元氣、味千、富臨漁港、鴻星、意粉屋...通通都冇，呢啲咁平民級數嘅食肆，東涌、將軍澳、大埔、上水、馬鞍山區區都有，偏偏天水圍就係連一間似樣小小嘅都冇。全區最好嘅酒樓得間「美心」、西餐最高級嘅係「椰林閣」，想搵間連鎖壽司舖咩? 得「元綠」，真係問你死未!所以如果有人問「有錢係咪大晒」，我真係可以好肯定咁答一句，響天水圍，「有錢真係唔係大晒o架老細」。咁冇錢又得唔得呢? 咁又真係唔得，天水圍區內消費相比市區「只有更貴、沒有最貴」，望下市中心嘉湖銀座『羊城』嘅點心價錢牌，完全唔係新市鎮應有嘅價錢。奧運站成萬蚊呎樓嘅住客同住嘉湖三四千蚊呎樓嘅住客，落屋企樓下飲餐茶消費水平竟然一樣，你話唔悲情就假嘅。不過無計，貴都要幫襯，因為區內真係無乜競爭，所以區內食肆先可以又收得貴，又咁唔長進。「羊城」
不過如果以「民以食為天」呢個標準嚟計，天水圍的確超級悲情，事關就算肯花錢，都冇好嘢你食；求其數幾間(已經唔叫得做好嘅)連鎖食肆，burger king、扒皇、牛陣、翠華、元氣、味千、富臨漁港、鴻星、意粉屋...通通都冇，呢啲咁平民級數嘅食肆，東涌、將軍澳、大埔、上水、馬鞍山區區都有，偏偏天水圍就係連一間似樣小小嘅都冇。全區最好嘅酒樓得間「美心」、西餐最高級嘅係「椰林閣」，想搵間連鎖壽司舖咩? 得「元綠」，真係問你死未!
所以如果有人問「有錢係咪大晒」，我真係可以好肯定咁答一句，響天水圍，「有錢真係唔係大晒o架老細」。
咁冇錢又得唔得呢? 咁又真係唔得，天水圍區內消費相比市區「只有更貴、沒有最貴」，望下市中心嘉湖銀座『羊城』嘅點心價錢牌，完全唔係新市鎮應有嘅價錢。奧運站成萬蚊呎樓嘅住客同住嘉湖三四千蚊呎樓嘅住客，落屋企樓下飲餐茶消費水平竟然一樣，你話唔悲情就假嘅。不過無計，貴都要幫襯，因為區內真係無乜競爭，所以區內食肆先可以又收得貴，又咁唔長進。「羊城」算係區內「無咁差」嘅少數酒樓之一，所以無論閒日定假日早到晚都係爆場。但係講真，衛生、服務都近乎唔合格邊緣...
先講個環境，其實間酒樓係傳統大禮堂酒樓，仲間咗好多房，都算闊落嘅。可惜間酒樓跟隨低級酒樓做法設「大排檔」，仲不時叫咪宣傳諸如「而家起各式煎炸點心特價$6.8，請去大排檔取用」，大量食客(尤其係細路)就係咁捧住一碟二碟穿梭來往，平添混亂。每逢下午茶時段中段，即大約三點鐘，店方就會突然熄去水晶燈；明明全場滿座，但全店就無端端失去一半亮度，好唔尊重客人。再食多一陣，其他食客陸續離席，店員又會將已離席嘅餐檯收起準備晚市，明明自己仲嘆緊茶，轉眼就會發覺身處孤島一樣，又係唔尊重客人表現。不過老實講以上情況出名啲嘅酒樓都間中出現嘅，只好認命啦。
環境一般，員工衛生同服務意識都非常一般。去得呢種屋邨酒樓都預咗自己動手用滾水洗下餐具，但求食物「無添加」(即係小強呀)就算。但有圖可見，點心送上檯次次張電腦柯打紙都掹一半唔掹一半，張紙仲要貼咗響食物上面，觀感真係扣晒分。部長問開乜嘢茶，點壽眉結果來普洱。有冇上心? 冇。想落單、加水，經理、部長、夥記全部時運高睇唔到，有冇服務水準?冇。劉德華果句，唔打喇...
再睇下籠蝦餃，真係好想知個師傅點解可以接受到自己做事咁求其，邊有可能四粒蝦餃咁樣擺設先? 四粒有三粒黏住蒸籠，你估個蒸籠好乾淨? 服務員唔帶眼唔帶耳直行直過都算，廚房出品嘅師傅好心就上心少少啦，成間酒樓職工(連部長)都求求其其唔想做咁款，所以話呢，無競爭唔單止無進步，直情令人唔長進。
雖然彈咗咁多，不過食物味道同質素又畀「羊城」攞返唔少credits，真係畀佢吹脹。點心係好食嘅，傳統港式酒樓口味，無花巧鹹甜美點，無扮野矜貴食材，簡單形容就係「穩打穩扎」。一間茶樓點心質素係點，試勻叉燒飽、蝦餃、腸粉基本可以有結論。
叉燒飽合格以上，部份叉燒燶咗都照用影響味道有點可惜。
蝦餃唔計擺設的話其實相當唔錯，大大隻內含三四隻小河蝦，無腥味怪味，算得上新鮮。蝦餃皮稍厚，仍屬可以接受範圍。
叉燒腸粉相當滑溜，要讚嘅係並無出現無端端落大量芫茜嘅通病，好味好味好味道! 但係班師傅唔用心嘅情況又出現，叉燒粒半條有半條冇，撤得平均少少都求其，唉。
黑椒牛肚同瑤柱節瓜甫同樣有驚喜，牛肚夠入味又稔，用黑椒調味比柱候更惹味，正。
節瓜甫上肉球原來內含一隻隻蝦肉，仲有大量瑤柱，真係估佢唔到。
總結，呢間茶樓其實食物都唔錯嘅，不過服務水平真係大陸級數。雖則區內無乜競爭對手(其他對手整體質素仲差)，但係呢個時代咁唔用心嘅食肆真係會被淘汰，以前新光、幸福樓、漢寶通通係前車可鑑，好心就爭氣啲啦!
Post
